काठमाडौ १२ जेठ ।
काठमाडौंको कोटेश्वरमा बसले स्कुटरलाई ठक्कर दिँदा एक जनाको मृत्यु भएको छ।

रामेछाप गोकुलगंगा गाउँपालिका-१ का ३७ वर्षीय आशाबहादुर नेवारको मृत्यु भएको महानगरीय प्रहरी कार्यालयका प्रवक्ता प्रहरी उपरीक्षक दिनेशराज मैनालीले जानकारी दिए। मृतक स्कुटर चालक हुन्। उनका अनुसार बिहीबार दिउँसो काठमाडौं महानगरपालिका-३२ कोटेश्वरचोक नजिक सडकखण्डमा दुर्घटना भएको हो।

कोटेश्वरबाट बालकुमारीतर्फ जाँदै गरेको बा २ ख ६१२१ नम्बरको बसले स्कुटरलाई ठक्कर दिएको हो। बा ८९ प ९०२४ नम्बरको स्कुटर सोही दिशातर्फ जाँदै थियो। घाइते नेवारलाई उपचारका लागि बिएण्डबी अस्पताल ललितपुर लगिएको थियो। उनको उपचारको क्रममा मृत्यु भएको प्रहरी उपरीक्षक मैनालीले जानकारी दिए।

बस र चालक कोटेश्वर प्रहरी प्रभागको नियन्त्रणमा रहेको जनाइएको छ।