सत्ता गठबन्धनको बैठकले निर्वाचनको समीक्षा गरेको छ । गठबन्धन सम्वद्ध दलका शीर्ष नेताको बैठकले गठबन्धन तल्लो तहसम्म नहुँदा अपेक्षित नतिजा आउन नसकेको निष्कर्ष निकालेको हो ।

“हामीले स्थानीय तह निर्वाचनको समीक्षा गर्‍यौं । तल्लो तहसम्म गठबन्धन हुन नसकेको स्वीकार पनि गर्‍यौं,” सत्ता गठबन्धनका संयोजक रामचन्द्र पौडेलले भने, “तल्लो तहसम्म गठबन्धन हुन सकेको भए यो भन्दा राम्रो नतिजा निस्कन्थ्यो ।” उनले बैठकले गठबन्धन आशातित सफल हुन नसके पनि सन्तोषजनक भएको निष्कर्ष निकालेको पनि जानकारी दिए ।

“गठबन्धनले जति नतिजा निकाल्न सक्नुपर्थ्यो, तल्लो तहसम्म गठबन्धन हुन नसक्दा त्यति जित हुन सकेन तर पनि गठबन्धन सन्तोषजनक भएको छ,” पौडेलले भने, “अब स्थानीय तहका कार्यपालिका र जिल्ला समन्वय समितिमा पनि गठबन्धन गर्ने निर्णय गरेका छौं ।”